ਤਾਜਾ ਖਬਰਾਂ
ਕੇਂਦਰ ਸਰਕਾਰ ਨੇ ਦੇਸ਼ ਦੀ ਪ੍ਰਸ਼ਾਸਕੀ ਅਤੇ ਸੱਭਿਆਚਾਰਕ ਪਹਚਾਣ ਵਿੱਚ ਮਹੱਤਵਪੂਰਣ ਤਬਦੀਲੀ ਕਰਦਿਆਂ ਪ੍ਰਧਾਨ ਮੰਤਰੀ ਦਫ਼ਤਰ (PMO), ਰਾਜ ਭਵਨ ਤੇ ਕੇਂਦਰੀ ਸਕੱਤਰੇਤ ਵਰਗੀਆਂ ਮੁੱਖ ਸਰਕਾਰੀ ਇਮਾਰਤਾਂ ਦੇ ਨਾਂ ਬਦਲ ਦਿੱਤੇ ਹਨ। ਨਵੀਂ ਨੀਤੀ ਅਧੀਨ, PMO ਨੂੰ ਹੁਣ ‘ਸੇਵਾ ਤੀਰਥ’ ਦੇ ਨਾਂ ਨਾਲ ਜਾਣਿਆ ਜਾਵੇਗਾ, ਜਦਕਿ ਰਾਜਪਾਲਾਂ ਦੇ ਰਿਹਾਇਸ਼ ਅਤੇ ਦਫ਼ਤਰਾਂ ਲਈ ਵਰਤਿਆ ਜਾਣ ਵਾਲਾ ‘ਰਾਜ ਭਵਨ’ ਸ਼ਬਦ ਹੁਣ ‘ਲੋਕ ਭਵਨ’ ਹੋਵੇਗਾ। ਕੇਂਦਰੀ ਸਕੱਤਰੇਤ ਦਾ ਨਾਂ ਵੀ ਬਦਲ ਕੇ ‘ਕਰਤੱਵ ਭਵਨ’ ਰੱਖਿਆ ਗਿਆ ਹੈ, ਜਿਸਨੂੰ ਸਰਕਾਰ ਸੱਤਾ ਦੀ ਥਾਂ ਸੇਵਾ-ਕੇਂਦ੍ਰਿਤ ਸੋਚ ਦੀ ਨਿਸ਼ਾਨੀ ਵਜੋਂ ਦਰਸਾ ਰਹੀ ਹੈ।
ਰਾਜ ਭਵਨ ਦਾ ਨਾਂ ਬਦਲਣ ਦੇ ਪਿੱਛੇ ਕੇਂਦਰੀ ਗ੍ਰਹਿ ਮੰਤਰਾਲੇ ਨੇ ਦੱਸਿਆ ਕਿ ਇਹ ਚਰਚਾ ਪਿਛਲੇ ਸਾਲ ਰਾਜਪਾਲਾਂ ਦੇ ਸੰਮੇਲਨ ਵਿੱਚ ਹੋਈ ਸੀ। ਮੰਤਰਾਲੇ ਦੇ ਅਨੁਸਾਰ, ‘ਰਾਜ ਭਵਨ’ ਸ਼ਬਦ ਗੁਲਾਮੀ ਅਤੇ ਰਾਜਸ਼ਾਹੀ ਪ੍ਰਥਾ ਦੀ ਯਾਦ ਦਿਵਾਉਂਦਾ ਹੈ, ਜਿਸਨੂੰ ਲੋਕਤੰਤਰਿਕ ਮੁੱਲਾਂ ਨਾਲ ਮੇਲ ਨਹੀਂ ਖਾਂਦਾ। ਇਸ ਲਈ, ਲੋਕਾਂ ਦੀ ਸਰਵੋਚਤਾ ਨੂੰ ਦਰਸਾਉਂਦੇ ਹੋਏ ਨਵਾਂ ਨਾਂ ‘ਲੋਕ ਭਵਨ’ ਚੁਣਿਆ ਗਿਆ ਹੈ, ਜੋ ਰਾਜਪਾਲਾਂ ਅਤੇ ਉਪ-ਰਾਜਪਾਲਾਂ ਦੀ ਭੂਮਿਕਾ ਨੂੰ ਹੋਰ ਜਨ-ਕੇਂਦਰਿਤ ਬਣਾਉਂਦਾ ਹੈ।
ਇਸ ਬਦਲਾਅ ਦੇ ਤਹਿਤ, ਪ੍ਰਧਾਨ ਮੰਤਰੀ ਦਫ਼ਤਰ ਸਿਰਫ਼ ਨਾਂ ਹੀ ਨਹੀਂ ਬਦਲੇਗਾ, ਸਗੋਂ ਆਪਣੀ ਸਥਿਤੀ ਵੀ ਬਦਲੇਗਾ। 78 ਸਾਲ ਪੁਰਾਣੇ ਸਾਊਥ ਬਲਾਕ ਤੋਂ PMO ਨੂੰ ਨਵੀਂ ਤਿਆਰ ਕੀਤੀਆਂ ‘ਸੇਵਾ ਤੀਰਥ’ ਇਮਾਰਤਾਂ ਵਿੱਚ ਮੋੜਿਆ ਜਾਵੇਗਾ, ਜੋ ਸੈਂਟਰਲ ਵਿਸਟਾ ਪੁਨਰ ਵਿਕਾਸ ਪ੍ਰੋਜੈਕਟ ਦਾ ਇੱਕ ਮੁੱਖ ਹਿੱਸਾ ਹੈ। ਸੇਵਾ ਤੀਰਥ-1 ਵਿੱਚ PMO, ਸੇਵਾ ਤੀਰਥ-2 ਵਿੱਚ ਕੈਬਨਿਟ ਸਕੱਤਰੇਤ ਅਤੇ ਸੇਵਾ ਤੀਰਥ-3 ਵਿੱਚ ਰਾਸ਼ਟਰੀ ਸੁਰੱਖਿਆ ਸਲਾਹਕਾਰ ਦਾ ਦਫ਼ਤਰ ਹੋਵੇਗਾ, ਜਿਸ ਨਾਲ ਪ੍ਰਸ਼ਾਸਕੀ ਕੰਮਕਾਜ ਹੋਰ ਆਧੁਨਿਕ ਅਤੇ ਸੁਚਾਰੂ ਹੋਵੇਗਾ।
ਇਸ ਤੋਂ ਪਹਿਲਾਂ ਵੀ ਕੇਂਦਰ ਸਰਕਾਰ ਨੇ ਰਾਸ਼ਟਰੀ ਪਛਾਣ ਨਾਲ ਜੁੜੇ ਕਈ ਨਾਵਾਂ ਵਿੱਚ ਬਦਲਾਅ ਕੀਤੇ ਸਨ। 2022 ਵਿੱਚ ‘ਰਾਜਪਥ’ ਦਾ ਨਾਂ ਬਦਲਕੇ ‘ਕਰਤੱਵ ਪਥ’ ਕੀਤਾ ਗਿਆ ਸੀ, ਤੇ 2016 ਵਿੱਚ ਪ੍ਰਧਾਨ ਮੰਤਰੀ ਦੀ ਰਿਹਾਇਸ਼ ਰੇਸ ਕੋਰਸ ਰੋਡ ਨੂੰ ‘ਲੋਕ ਕਲਿਆਣ ਮਾਰਗ’ ਨਾਮ ਦਿੱਤਾ ਗਿਆ ਸੀ। 20 ਹਜ਼ਾਰ ਕਰੋੜ ਰੁਪਏ ਦੇ ਬਜਟ ਵਾਲਾ ਸੈਂਟਰਲ ਵਿਸਟਾ ਪ੍ਰੋਜੈਕਟ ਰਾਸ਼ਟਰਪਤੀ ਭਵਨ ਤੋਂ ਇੰਡੀਆ ਗੇਟ ਤੱਕ ਨਵੇਂ ਭਾਰਤ ਦੀ ਆਧੁਨਿਕ ਤੇ ਸੱਭਿਆਚਾਰਕ ਦ੍ਰਿਸ਼ਟੀ ਨੂੰ ਦਰਸਾਉਂਦਾ ਕੈਂਪਸ ਤਿਆਰ ਕਰ ਰਿਹਾ ਹੈ।
Get all latest content delivered to your email a few times a month.
